ހއ.ދިއްދޫގައި ބައިނަލްއަޤްވާމީ ފުޓްބޯޅަ ދަނޑެއް ތަރައްޤީކޮށްދެއްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ މިހާރު ހއ.އަތޮޅުގެ ރަށްރަށަށް ކުރަވަމުން ގެންދަވާ ދަތުރުފުޅުގެ ތެރެއިން ހއ.ދިއްދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގަ އެވެ.

ރައީސް ވިދާޅުވީ ރިޔާސީ އިންތިހާބުގެ ކެމްޕެއިނުގެ ތެރެއިންވެސް މި ރަށުގައި ދަނޑެއް އަޅައިދެއްވާނެކަމަށް ވިދާޅުވެފައިވާނެކަމަށާއި، އެ މަސައްކަތް މި އަހަރުގެ ތެރޭގައި ފައްޓަވައިދެއްވާނެކަމަށެވެ. އޭނާ ވިދާޅުވީ މި ރަށުގެ ޒުވާނުންގެ އެންމެ ބޮޑު އެދުމަކީ މިއީ ކަމަށާއި، ރަށް ރަށަށް ތަރައްޤީ ގެނެސްދެއްވަނީ އެ ރަށެއްގައި ދިރިއުޅޭ ބައެއް ބޭނުންވާ ގޮތަށްކަމަށެވެ. 

ހއ. ދިއްދޫ އަކީ މި އަތޮޅުގައި އެންމެ ބޮޑެތި ފުޓްބޯޅަ މުބާރާތްތަކެއް ބާއްވަމުން އަންނަ ރަށެކެވެ. 

މި ރަށުގައި ޤާއިމްކުރާ ފުޓްބޯޅަ ދަނޑުގެ އިތުރުން އެހެން ކުޅިވަރު ވަސީލަތްތައް ފުރިހަމަކޮށްދެއްވުމަށް މަސައްކަތްކޮށްދެއްވާނެކަމަށްވެސް ރައީސް ވިދާޅުވި އެވެ.