ދިވެހި ޤައުމީ ޔުނިވާސިޓީގެ ދަރިވަރުންގެ ޖަމިއްޔާއިން، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއާ ބައްދަލުކުރައްވައިފި އެވެ.

ކުޅިވަރު ވުޒާރާގައި ކުރިއަށްދިޔަ މި ބައްދަލުވުމަކީ މިއަހަރު ޤައުމީ ޔުނިވާސިޓީގެ ދަރިވަރުންގެ ޖަމިއްޔާއިން ކުރިއަށްގެންދިޔަ ހަރަކާތްތަކާއި، އަންނަ އަހަރަށް ރޭވިފައިހުރި ހަރަކާތްތަކާ ގުޅޭގޮތުން މަޝްވަރާކުރުމަށް ކުރިއަށްގެންދިޔަ ބައްދަލުވުމެކެވެ.

ދިވެހި ޤައުމީ ޔުނިވާސިޓީގެ ދަރިވަރުންގެ ޖަމިއްޔާއިން ވަނީ މިއަހަރު ގިނަ ކުޅިވަރު ހަރަކާތްތަކެއް ހިންގާފަ އެވެ. މިގޮތުން ހޭންޑްބޯޅަ، ވޮލީބޯޅަ، ފުޓްސަލް، ބެޑްމިންޓަން، ކެރަމް ކަހަލަ ގިނަ ކުޅިވަރު މުބާރާތްތަކެއް އެ ޔުނިވާސިޓީގެ އެކި ގޮފިތަކަށް ހުޅުވާލައިގެންނާއި، އެހެން ކޮލެޖު/ޔުނިވާސިޓީތަކަށް ހުޅުވާލައިގެން ހިންގި އެވެ.

ދަރިވަރުންގެ ޖަމިއްޔާއިން ވަނީ އެ ޖަމިއްޔާއިން ހިންގި ހަރަކާތްތަކަށް ކުޅިވަރު ވުޒާރާއިން ލިބުނު އެއްބާރުލުން ފާހަގަކޮށްފަ އެވެ. އަދި އެކަމަށް އެ ޖަމިއްޔާއިން ވަނީ ޝުކުރު އަދާކޮށްފަ އެވެ.

އަންނަ އަހަރުވެސް ގިނަ ހަރަކާތްތަކެއް ހުރިކަން ފާހަގަކޮށް، އެ ޖަމިއްޔާއިން ވަނީ މި ހަރަކާތްތަކުގެ ތަފްސީލްތައް ހިއްސާކޮށްފަ އެވެ.

މި ބައްދަލުވުމުގައި ކުޅިވަރު ވަޒީރު ވަނީ އެ ޖަމިއްޔާއިން، ކުޅިވަރުގެ ތެރެއިން ޒުވާނުން ބާރުވެރިކުރުވުމަށް ކުރަމުން އަންނަ މަސައްކަތް ފާހަގަކުރައްވާފަ އެވެ. އަދި އެ ޖަމިއްޔާއިން ހިންގާ ހަރަކާތްތަކަށް އަބަދުވެސް ކުޅިވަރު ވުޒާރާގެ ފަރާތުން އެއްބާރުލުން ލިބޭނެކަމަށް އޭނާ ވިދާޅުވި އެވެ.