10ވަނަ ގައުމީ ޗެސް މުބާރާތުގެ އިނާމް ދިނުމުގެ ރަސްމިއްޔާތު، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ޝަރަފްވެރިކޮށްދެއްވައިފި އެވެ.

ގައުމީ ޗެސް މުބާރާތުގެ އޯޕަން ބައިގެ އަންހެން އަދި ފިރިހެން ޗެމްޕިއަން ކުޅުންތެރިންނަށް އިނާމް ހަވާލުކޮށްދެއްވީ މިނިސްޓަރ ޢަބްދުﷲ ރާފިޢު އެވެ.

އަންހެން ބައިގެ ޗެމްޕިއަންކަން ހޯދީ ނިހާޔާ އަޙުމަދު އެވެ. އަދި ފިރިހެން ބައިގެ ޗެމްޕިއަންކަން ހޯދީ މުޙައްމަދު ޝުއާއު އެވެ. މިއަހަރުގެ ގައުމީ ޗެސް މުބާރާތަކީ މިހާތަނަށް އެންެމެ ގިނަ ކުޅުންތެރިން ވާދަކުރި ގައުމީ މުބާރާތެވެ.

މިގޮތުން މިއަހަރު ދެ ކެޓަގަރީގައި 111 ކުޅުންތެރިން ވާދަކުރި އެވެ. އެއީ އަންހެން ކެޓަގަރީގައި 33 ކުޅުންތެރިންނާއި އޯޕަން ބައިގައި 78 ކުޅުންތެރިންނެވެ. މެއި މަހުގެ 27 އިން ޖޫން ހަތަކަށް ކުރިއަށްދިޔަ މުބާރާތުގެ ދެ ކެޓަގަރީގައި ޖުމްލަ 580 މެޗު ކުޅުނެވެ.

މި އަދަދުތަކަކީ މިދިޔަ އަހަރާ ބަލާއިރު 24 އިންސައްތަ ކުރިއެރުމެކެވެ. މިދިޔަ އަހަރުގެ އަންހެން ބައިގައި ވާދަކުރީ 19 ކުޅުންތެރިންނެވެ. އޯޕަން ބައިގައި ވާދަކުރީ 65 ކުޅުންތެރިންނެވެ.