ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު މިއަދު ގއ.ދާންދޫ ކައުންސިލާ ބައްދަލުކުރައްވައިފި އެވެ.

މި ބައްދަލުވުމަކީ ކުޅިވަރުގެ ދާއިރާއިން ދާންދޫއަށް ބޭނުންވާ ކަންކަމާއި، ސަރުކާރުން އެ ރަށުގައި ގާއިމްކުރުމަށް ހަމަޖެހިފައިވާ ކުޅިވަރު ވަސީލަތްތަކާއި ގުޅޭގޮތުން ވަނީ މަޝްވަރާ ކުރުމަށް ބޭއްވުނު ބައްދަލުކުރެއްވުމެކެވެ. މި ބައްދަލުވުމުގައި ކުޅިވަރު ވުޒާރާގެ ސްޓޭޓް މިނިސްޓަރު އިބްރާހިމް އާމިރު އާއި ޑެޕިއުޓީ މިނިސްޓަރ ހުސައިން ނިހާދުވެސް ބައިވެރިވެވަޑައިގެންނެވި އެވެ. 

މިގޮތުން އެ ރަށު ކައުންސިލުން ވަނީ ރަށުގައި މިވަގުތު އެންމެ ފޯރިއާއިއެކު ކުޅެމުންދާ ކުޅިވަރުތަކާއި، އެ ކުޅިވަރުތައް ކުރިއަށްގެންދިޔުމަށް ދިމާވެފައިވާ ދަތިތައް ވަޒީރު ރާފިޢުއާ ހިއްސާކުރައްވާފަ އެވެ. އަދި އެ ރަށަށް ބޭނުންވާ ކުޅިވަރު ވަސީލަތްތަކުގެ މައުލޫމާތުވެސް ކައުންސިލުން ވަނީ ވަޒީރުއާ ހިއްސާކުރައްވާފަ އެވެ. 

މި ބައްދަލުވުމުގައި ވަޒީރު ރާފިޢު ވަނީ އެ ރަށު ކައުންސިލުން ފާހަގަކޮށްފައިވާ ކަންކަމަށް އެހީތެރިވެދެއްވާނެ ކަމުގެ ޔަގީންކަން ދެއްވާފަ އެވެ. އަދި ސަރުކާރުގެ ބަޖެޓުގައި ހިމަނައިގެން މިއަހަރު އެ ރަށުގައި ކުރިއަށްގެންދަން ހަމަޖެހިފައިވާ ކުޅިވަރު މަޝްރޫޢުތަކުގެ މައުލޫމާތުވެސް ވަޒީރު ވަނީ ކައުންސިލަށް ދެއްވާފަ އެވެ.