ފުވައްމުލަކު ސިޓީ ކައުންސިލުން ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއާ ބައްދަލުކުރައްވައިފި އެވެ.

ކުޅިވަރާއި ހަށިހެޔޮކަމާ ބެހޭ ވުޒާރާގައި ކުރިއަށްދިޔަ މި ބައްދަލުވުމުގައި ފުވައްމުލަކު ސިޓީ ކައުންސިލްގެ މޭޔަރ އިސްމާޢީލް ރަފީޤް ބައިވެރިވެވަޑައިގެންނެވި އެވެ.

މި ބައްދަލުވުމަކީ ފުވައްމުލަކުގައި މިވަގުތު ކުރިއަށްދާ ކުޅިވަރު މަޝްރޫޢުތަކާ ގުޅޭގޮތުން މައުލޫމާތު ހިއްސާކުރުމަށް އޮތް ބައްދަލުވުމެކެވެ. މިގޮތުން އެ ރަށުގައި މިވަގުތު ކުރިއަށްދާ ފާހަގަކޮށްލެވޭ މަޝްރޫޢުތަކުގެ މައުލޫމާތު ކައުންސިލުން ވަނީ ވަޒީރު ރާފިޢުއާ ހިއްސާކުރައްވާފަ އެވެ.

މި ސަރުކާރުން ފުވައްމުލަކުގައި އެންމެ ފަހުން ފެށި މަޝްރޫޢުއަކީ އެ ރަށުގެ ދެ އަވަށެއްގައި ފުޓްސަލް ދަނޑު އެޅުމަށް ފެށި މަޝްރޫޢެވެ. މިކަމާ ގުޅޭ މައުލޫމާތު ކުޅިވަރު ވުޒާރާގެ ޕްރޮޖެކްޓްސް ޑިޕާޓްމަންޓުން ވަނީ މޭޔަރ އިސްމާޢީލް ރަފީޤްއާ ހިއްސާކޮށްފަ އެވެ.

މީގެ އިތުރުން އަންނަ އަހަރުގެ ބަޖެޓުގައި ހިމަނައިގެން ފުވައްމުލަކުގައި ކުރިއަށްގެންދަން ނިންމާފައިވާ ކަންކަމާ ގުޅޭގޮތުންވެސް މި ބައްދަލުވުމުގައި ވަނީ މަޝްވަރާ ކުރެވިފަ އެވެ.