ރާއްޖޭގައި ބާއްވާ ފުރަތަމަ ބައިނަލްއަޤްވާމީ އާރޓް ފެސްޓިވަލް ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިހް ހުޅުއްވައިދެއްވައިފިއެެވެ.

"ފަރުމާ- އިންޓަރނޭޝަނަލް ޔޫތް އާޓް ފެސްޓިވަލް 2023" ގެ ނަމުގައި ކުރިޔަށްގެންދާ މި ފެސްޓިވަލް ރައީސުލްޖުމްހޫރިއްޔާ ހުޅުއްވައިދެއްވީ އެކަމަށްޓަކައި ސޯޝަލް ސެންޓަރގައި ބޭއްވި ޚާއްސަ ރަސްމިއްޔާތެއްގައެވެ.

މި ރަސްމިއްޔާތުގައި ރައީސުލްޖުމްހޫރިއްޔާގެ އިތުުރުން އުއްތަމަ ފަނޑިޔާރު އަހުމަދު މުއުތަސިމް އަދުނާން އަދި  މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަހްލޫފްގެ އިތުރުން މޯލްޑިވިއަން އާޓިސްޓް ކޮމިއުނިޓީގެ އިސްވެރިން ވަނީ ބައިވެރިވެވަޑައިގެންފައެވެ.

މާފަންނު ސޯޝަލް ސެންޓަރ އެތެރޭ ކޯޓުގައި ކުރިޔަށްގެންދާ މި ފެސްޓިވަލް ކުރިޔަށްދާނީ، 8 މެއި 2023 އިން 13 މެއި 2023 ގެ ނިޔަލަށެވެ.

މި ފެސްޓިވަލްގައި އާޓިސްޓުންގެ ގޮތުގައި 7 ޤައުމަކުން 11 ފަންނުވެރިން ޕެއިންޓިންގ އަދި ކެލިގްރަފީގެ ދާއިރާއިން ބައިވެރިވާނެއެވެ. އަދި ރާއްޖޭގެ 40 އަށް ވުރެ ގިނަ ފަންނުވެރިންގެ ހުނަރު މި ފެސްޓިވަލުން ފެނިގެންދާނެއެވެ.

ޖުމްލަ 10 ދާއިރާއަކުން ފަންނުވެރިން ބައިވެރިވެއެވެ. އޭގެ ތެރޭގައި ކުރެހުން، ޕެއިންޓިން، ފޮޓޯގްރަފީ ފުޑް އެންޑް ކަލިނަރީ މިއުޒިގެ ދާއިރާފަދަ ދާއިރާތައް ހިމެނެއެވެ. އަދި 8 ޤައުމަކުން 80 ވުރެ ގިނަ ފަންނުވެރީން ބައިވެރިވެފައިވެއެވެ. މި ފެސްޓިވަލްގައި ބައިވެރިވި ޤައުމުތަކުގައި އިންޑިއާ، ވިއެޓްނާމް، އުޒްބެކިސްތާނު، އީރާން ހިމެނެއެވެ. މީގެ އިތުރުން ޔުނައިޓެޑް ޢަރަބް އެމިރޭޓްސް، ސީރިއާއި ލުބުނާން ފަދަ ޤައުމުތައް ހިމެނެއެވެ.