ތިން ވަނަ އޭޝިއަން ސާފިން ޗެމްޕިއަންޝިޕް 2024 ނިމުމުގެ ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު ބައިވެރިވެވަޑައިގެންފި އެވެ.

މިމަހުގެ 17 ވަނަ ދުވަހު ތުލުސްދޫގައި ފެށި އޭޝިއަން ސާފިން ޗެމްޕިއަންޝިޕްގައި މިއަހަރު 20 ގައުމަކުން 100 އަށްވުރެ އެތުލީޓުން ވާދަކުރި އެވެ. މިއީ މިހާތަނަށް އެންމެ ގިނަ ގައުމުތަކުން އެންމެ ގިނަ އެތުލީޓުން ވާދަކުރި މުބާރާތެވެ.

މިފަހަރުގެ މުބާރާތް ހާއްސަވި އަނެއް ސަބަބަކީ މިއީ 2026ގެ އޭޝިއަން ގޭމްސްގެ ކޮލިފައިން އިވެންޓަކަށްވުމެވެ. މި ފުރުސަތުގެ ބޭނުން ހިފައި ދިވެހިރާއްޖޭގެ އަންހެން އަދި ފިރިހެން ޓީމުން ވަނީ ޖަޕާންގައި އޮންނަ އޭޝިއަން ގޭމްސް އިން ޖާގައެއް ކަށަވަރުކޮށްފަ އެވެ. ދެ ޓީމްވެސް ކޮލިފައިވީ ދެކުނު އޭޝިއާގެ އެންމެ ރަނގަޅު ނަތީޖާ ހޯދި ގައުމުގެ ގޮތުގަ އެވެ.

މިއަދު ތުލުސްދޫގައި އޮތް އޭޝިއަން ސާފިން ޗެމްޕިއަންޝިޕްގެ ނިމުމުގެ ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ބައިވެރިވެވަޑައިގެންނެވިއިރު، މުބާރާތުގެ ވަނަތަކަށް ހޮވުނު އެތުލީޓުންނަށް މެޑަލްވެސް ހަވާލްކޮށްދެއްވީ ވަޒީރު ރާފިޢު އެވެ.

މިއަހަރުގެ އޭޝިއަން ސާފިން ޗެމްޕިއަންޝިޕަކީ އޭޝިއަން ގޭމްސްގެ ކޮލިފައިން އިވެންޓަކަށްވިއިރު، މިއީ ދިވެހިރާއްޖޭގައި ބޭއްވި އޭޝިއަން ގޭމްސްގެ ކޮލިފައިން ފުރަތަމަ އިވެންޓެވެ.