2026 ވަނަ އަހަރު ޖަޕާންގައި އޮންނަ އޭޝިއަން ގޭމްސްގެ ސާފިން އިވެންޓުން ފުރުސަތު ހޯދި ދިވެހިރާއްޖޭގެ އަންހެން އަދި ފިރިހެން ސާފިން ޓީމަށް، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު މަރުޙަބާ ދަންނަވައިފި އެވެ.

ތިން ވަނަ އޭޝިއަން ސާފިން ޗެމްޕިއަންޝިޕް ނިމުމުގެ ރަސްމިއްޔާތު މިއަދު ކ. ތުލުސްދޫގައި އޮތްއިރު، މި އިވެންޓު ޝަރަފްވެރިކޮށްދެއްވީ މެޑަމް ސާޖިދާ އެވެ. މި ރަސްމިއްޔާތުގައި މުބާރާތުން ވަނަ ހޯދި އެތުލީޓުންނަށް މެޑަލް ހަވާލުކުރުމުގެ އިތުރުން 2026ގެ އޭޝިއަން ގޭމްސް އަށް ކޮލިފައިވި ޓީމްތަކަށް އެކަމުގެ ހަނދާނީ ޓޯކަން ހަވާލުކުރެވުނެވެ. ޓޯކަންތައް ހަވާލުކޮށްދެއްވީ މެޑަމް ސާޖިދާ އެވެ.

2026ގެ އޭޝިއަން ގޭމްސްއަށް ކޮލިފައިވި ގައުމުތަކުގެ ތެރޭގައި ދިވެހިރާއްޖެ ހިމެނޭއިރު، މިއީ އޭޝިއާގެ އެންމެ ބޮޑު ގޭމްސް އިން ދިވެހިރާއްޖޭގެ ޓީމެއް ކޮލިފައިވި ފުރަތަމަ ފަހަރެވެ. އަނެއްކޮޅުން މިއީ ދިވެހިރާއްޖޭގައި އޭޝިއަން ގޭމްސްގެ ކޮލިފައިން އިވެންޓެއް ބޭއްވި ފުރަތަމަ ފަހަރުވެސް މެ އެވެ.

ގައުމީ އަންހެން އަދި ފިރިހެން ސާފިން ޓީމުން ހޯދި ކާމިޔާބީ ފާހަގަކުރައްވާ މެޑަމް ސާޖިދާ ވަނީ ދެ ޓީމަށްވެސް މަރުޙަބާ ދަންނަވާފަ އެވެ. މީގެ އިތުރުން އޭޝިއަން ސާފިން ޗެމްޕިއަންޝިޕް 2024ގެ އިނާމް ދިނުމުގެ ރަސްމިއްޔާތަށްފަހު ޓީމާ ބައްދަލުކުރައްވާ ޓީމްގެ ކުޅުންތެރިންނަށް މެޑަމް ސާޖިދާ ވަނީ ހިތްވަރު ދެއްވާފަ އެވެ.