އިންޑޮނޭޝިއާގެ ބަތަމްގައި ބޭއްވި 56 ވަނަ އޭޝިއާ ބޮޑީބިލްޑިން އެންޑް ސްޕޯޓްސް ފިޒީކް ޗެމްޕިއަންޝިޕުގައި ރަންވަނަ ހޯދި އެތުލީޓުންނަށް، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު މަރުޙަބާ ދަންނަވައިފި އެވެ.

ވެލާނާ އިންޓަނޭޝަނަލް އެއާޕޯޓުން ޓީމަށް މަރުޙަބާ ދެންނެވީ ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢުގެ އިތުރުން ކޮމިޝަނަރ އޮފް ސްޕޯޓްސް މުޙައްމަދު ތޮލާލް އާއި މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރު އެވެ.

56 ވަނަ އޭޝިއާ ބޮޑީބިލްޑިން އެންޑް ސްޕޯޓްސް ފިޒީކް ޗެމްޕިއަންޝިޕުގައި ވާދަކޮށް ރާއްޖޭގެ ބޮޑީބިލްޑިން ޓީމުން ވަނީ ދެ ރަން މެޑަލް އާއި އެއް ރިހި މެޑަލް ހޯދާފަ އެވެ.

އެއީ މުބާރާތުގެ ސްޕޯޓްސް ފިޒީކްގެ 170 ސެންޓިމީޓަރު ކެޓަގަރީން އަޒްނީން ރަޝާދު ހޯދި ރަން މެޑަލް އާއި އެތުލެޓިކް ފިޒީކްގެ 175 ސެންޓިމީޓަރު ކެޓަގަރީން އަހުސަން ހޯދި ރަން މެޑަލް އެވެ. ރިހި މެޑަލް ހޯދައިދިނީ ޝާހީން އިބްރާހިމް ދީދީ އެވެ. އޭނާ މި މެޑަލް ހޯދީ މުބާރާތުގެ 60 ކިލޯ ކެޓަގަރީންނެވެ.

ޓީމަށް މަރުޙަބާ ދެންނެވުމަށްފަހު ވަޒީރު ރާފިޢު ވަނީ ބޮޑީބިލްޑިން ޓީމުން ބައިނަލްއަގްވާމީ މުބާރާތްތަކުގައި ހޯދަމުން އަންނަ ކާމިޔާބީތައް ފާހަގަކުރައްވާފަ އެވެ. އަދި މިފަހަރުގެ މުބާރާތުންވެސް ހޯދި މެޑަލްތަކަކީ ގައުމަށް ހޯދައިދިން ފަޚުރުވެރި ވަނައެއްގެ ގޮތުގައި ސިފަ ކުރައްވާ، ޓީމަށް މިނިސްޓަރ ރާފިޢު ވަނީ ހިތްވަރު ދެއްވާފަ އެވެ.