ޔޫރޯއަށް ޚާއްސަކޮށްގެން ޕަބްލިކް ސާވިސް މީޑިއާ (ޕީއެސްއެމް) އިން ގެނެސްދޭ ޚާއްސަ ކަވަރޭޖް، "ޕީއެސްއެމް ފޯރި 2024" މިނިސްޓަރ އޮފް ސްޕޯޓްސް ފިޓްނަސް އެންޑް ރެކްރިއޭޝަން ޢަބްދުﷲ ރާފިޢު ލޯންޗްކޮށްދެއްވައިފި އެވެ. 

މިމަހުގެ 14 ވަނަ ދުވަހު ފަށާ ޔޫރަޕްގެ އެންމެ ބޮޑު ފުޓްބޯޅަ މުބާރާތުގެ ބްރޯޑްކާސްޓިން ރައިޓްސް ހޯދުމަށްފަހު ޕީއެސްއެމް އިން ވަނީ މި މުބާރާތަށް ޚާއްސަ ކަވަރޭޖެއް ތައްޔާރުކޮށްފަ އެވެ. މި ކަވަރޭޖް ލޯންޗްކުރުން އޮތީ ރޭ ޕީއެސްއެމްގައި އޮތް ޚާއްސަ ރަސްމިއްޔާތެއްގަ އެވެ. 

މި ރަސްމިއްޔާތުގައި ވާހަކަދައްކަވަމުން ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު ވިދާޅުވީ ފުޓްބޯޅައަކީ ރާއްޖޭގެ ރައްޔިތުން އެންމެން އެކަތިގަނޑަކަށްވެ، އެއް އާއިލާއެއްގެ ގޮތުގައި ފޯރިއާއި ޖޯޝު ނަގައިގެން އުފާވެރި މާހައުލެއް ގެނެސްދޭ އެއްޗެއް ކަމަށެވެ. 

މިނިސްޓަރ ރާފިޢު ވިދާޅުވީ ދިވެހިރާއްޖޭގެ ކުޅިވަރު ކުރިއަށް އޮތް ތަނުގައި ފެންނަނީ ވަރަށް އުޖާލާކޮށް ކަމަށާއި، ވަކިން ޚާއްސަކޮށް ފުޓްބޯޅަ ކުރިއަށް އޮތް ދުވަސްތަކުގައި އިތުރަށް ފޯރިގަދަވެގެންދާނެކަމަށް އުއްމީދުކުރައްވާކަމަށް ވިދާޅުވި އެވެ. 

މީގެ އިތުރުން މުޅި ރާއްޖޭގައި ކުޅިވަރުތައް އާލާކޮށް، ކުޅިވަރު ކުރިއަރުވުމަށް ކުރާ މަސައްކަތުގައި ދިވެހި ސަރުކާރުން، އަދި ވަކިން ޚާއްސަކޮށް ރައީސުލްޖުމްހޫރިއްޔާގެ ޑރ. މުޙައްމަދު މުޢިއްޒުގެ ލަފާފުޅާއި އެހީތެރިކަން ދެއްވާތީވެ، އެކަމަށްޓަކައި އެ މަނިކުފާނަށް މިނިސްޓަރ ރާފިޢު ވަނީ ޝުކުރުދަންނަވާފަ އެވެ.

ރޭ ލޯންޗު ކުރި "ޕީއެސްއެމް ފޯރި 2024" ގައި ޔޫރޯ ފުޓްބޯޅަ މުބާރާތުގެ ހުރިހާ މައުލޫމާތެއް ޕީއެސްއެމްގެ ޗެނަލްތަކުން ގެނެސްދޭނެ އެވެ. މުބާރާތުގެ ހުރިހާ މެޗެއް ޕީއެސްއެމް އިން ލައިވްކުރާ ގޮތަށްވަނީ ހަމަޖެހިފަ އެވެ.