މޯލްޑިވްސް އޮލިމްޕިކް ކޮމިޓީގެ އަހަރީ އާންމު ޖަލްސާގައި ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު ބައިވެރިވެވަޑައިގަންނަވައިފިއެވެ. 

އެމްއޯސީގެ އަހަރީ އާންމު ޖަލްސާގައި ވަޒީރު ރާފިޢުވަނީ މިދިޔަ އަހަރު ދިވެހިރާއްޖެއިން ކުޅިވަރުގައި ހޯއްދެއްވި ކާމިޔާބީތަކާއި، ކުޅިވަރު ކުރިއެރުވުމަށް އެމްއޯސީއިން ކުރައްވަމުން އަންނަ މަސައްކަތްތައް ފާހަގަކުރައްވާފައެވެ. 

ވަޒީރު ރާފިޢު ވިދާޅުވީ 2024 ވަނަ އަހަރަކީ ކުޅިވަރުގައި އިންގިލާބީ ކާމިޔާބީތަކެއް ލިބުނު އަހަރެއް ކަމަށާއި، ދިވެހި ކުޅިވަރު އިތުރު ހަރުފަތަކަށް ކުރިއަށް ޖެހިލާފައިވާކަމަށެވެ. މިގޮތުން މިދިޔަ އަހަރުގެ އޮލިމްޕިކްސްއަށް ޓީޓީ ތަރި ދީމާ ކޮލިފައިވުމަކީ ދިވެހި ކުޅިވަރަށް ލިބުނު ބޮޑު ކާމިޔާބީއެއްގެ ގޮތުގައި އޭނާ ސިފަކުރެއްވިއެވެ. 

މިނިސްޓަރ ވިދާޅުވީ އެމްއޯސީއަކީ ސަރުކާރުން ކުޅިވަރު ކުރިއަރުވަން ކުރާ މަސައްކަތުގެ މުހިންމު ބައިވެރިއެއްކަމަށާއި، މިހާތަނަށް އެމްއޯސީއިން ދިވެހި ކުޅިވަރަށްކޮށްދެއްވާފައިވަނީ އަގުހުރި މަސައްކަތްތަކެއްކަމަށެވެ. ސަރުކާރުން ކުޅިވަރު ކުރިއެރުވުމަށް ތައްޔާރުކުރަމުން އަންނަ ދިގުރާސްތާ ޕްލޭންގެ ކަންކަމުގައި އެންމެ އިސްކޮށް ހަރަކާތްތެރިވެ، އެ މަސައްކަތުގައި އެމްއޯސީއިން ކޮށްދެއްވަމުން އަންނަ މަސައްކަތް މިނިސްޓަރ ފާހަގަކުރެއްވިއެވެ. 

ކުޅިވަރު ވަސީލަތްތައް ގާއިމްކުރުމާއި، ކުޅުންތެރިން ބިނާކުރުމާއި، ކުޅިވަރުގެ ހިންގުން ހަރުދަނާ ކުރުމަށް ސަރުކާރުން ކުރައްވަމުން އަންނަ މަސައްކަތްތައް މިއަހަރު އިތުރުކުރައްވާނެކަމަށް ވަޒީރު ވިދާޅުވިއެވެ. 

ވަޒީރު ވިދާޅުވީ ރައީސުލްޖުމްހޫރިއްޔާ ޑޜ. މުޙައްމަދު މުޢިއްޒު މިދިޔަ އަހަރު އިއުލާންކުރެއްވި ހައި ޕާފޯމަންސް ސެންޓަރުގެ މަސައްކަތަކީ ސަރުކާރުން މުހިންމު އިސްކަމެއްދެއްވާކަމެއްކަމަށެވެ. މިއީ ކުޅިވަރު އެސޯސިއޭޝަންތަކާއި، ކުޅުންތެރިންނަށް މުހިންމު ކަމަކަށްވާއިރު، މި ސެންޓަރުގެ ކޮންސެޕްޓް ޕޭޕާ ތައްޔާރުކުރެވި މިހާރު ކެބިނެޓަށް ހުށަހަޅާފައިވާކަމަށެވެ. އަދި މި ސެންޓަރަށް ބޭނުންވާ ފައިސާވެސް ބަޖެޓުގައި ހިމަނާފައިވާކަމަށް ވަޒީރު ވިދާޅުވިއެވެ.