ދުޅަހެޔޮ މުޖުތަމަޢުއެއް ބިނާކުރުމަކީ މިވަގުތު މުހިންމު އިސްކަމެއް ދޭން ޖެހޭ ކަމެއް ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ. 

މިނިސްޓަރ ރާފިޢު މިހެން ވިދާޅުވީ ދުޅަހެޔޮ ދިރިއުޅުމަށް އަމާޒުކޮށް  ޔުނިސެފުން ކުރިއަށްގެންދާ ސިލްސިލާ ބައްދަލުވުމުގެ ތިންވަނަ ބައި ފެށުމުގެ ރަސްމިއްޔާތުގަ އެވެ. މިފަހަރުގެ ބައްދަލުވުމުގެ މައުޟޫއަކީ ދުޅަހެޔޮ ދިރިއުޅުމަކަށް، ހެލިފެލިވެ އުޅުމުގެ މުހިންމުކަން "ކައިގެން ހިނގަމާ" ހަރަކާތެވެ. 

ޔުނިސެފުން އިންތިޒާމްކޮށްގެން ކުރިއަށްގެންދާ މި ހަރަކާތަކީ ކުޅިވަރާއި ހަށިހެކޮކަމާ ބެހޭ ވުޒާރާގެ އިތުރުން ސިއްޙީ ވުޒާރާގެވެސް ބައިވެރިވުމާއިއެކު ކުރިއަށްގެންދާ ހަރަކާތެކެވެ. މި ހަރަކާތުގައި އެޗްޕީއޭ އާއި ސިއްޙަތާ ގުޅުންހުރި އެކި ދާއިރާތަކުގެ މީހުންވެސް ބައިވެރިވި އެވެ. 

މި ރަސްމިއްޔާތުގައި ވާހަކަދައްކަވަމުން މިނިސްޓަރ ރާފިޢު ވިދާޅުވީ މިވަގުތު މުޖުތަމަޢުގެ އެންމެ ކަންބޮޑުވާން ޖެހޭ އެއް ކަމަކީ ގައިންގަޔަށް ނާރާ ބަލިތައް ގިނަވުންކަމަށެވެ. މިގޮތުން ހިތުގެ ބައްޔާއި ކެންސަރާއި ހަކުރު ބަލި އަދި ފުއްޕާމޭގެ ބަލި އިތުރުވަމުން ދަނީ ކަންބޮޑުވާ މިންވަރަކަށްކަންވެސް މިނިސްޓަރ ފާހަގަކުރެއްވި އެވެ. 

މިނިސްޓަރު ވިދާޅުވީ ސަރުކާރުގެ ސިޔާސަތުތަކުގެ ތެރޭގައިވެސް މި މައްސަލައަށް ހައްލު ހޯދުމަށް ކަންކަން ހިމެނިފައިވާނެކަމަށާއި، ކުޅިވަރު ވުޒާރާއިން ތައާރަފްކުރި "ފިޓްމޯލްޑިވްސް" އެޕްލިކޭޝަނަކީ އޭގެ ހެއްކެއްކަމަށެވެ. މިނިސްޓަރ ވިދާޅުވީ މި އެޕްލިކޭޝަނަކީ ދުޅަހެޔޮ މުޖުތަމަޢުއެއް ބިނާކުރުމަށް ބޮޑު ބާރަކަށްވާނެކަމަށެވެ.