މިހާރު ކުރިއަށްދާ ދިވެހި ޔޫތު ލީގުގެ 16 އަހަރުން ދަށުގެ މެޗުތައް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ޝަރަފްވެރިކޮށްދެއްވައިފި އެވެ.

ދިވެހި ޔޫތު ލީގަކީ ޒުވާން ކުޅުންތެރިންނަށް އަމާޒުކޮށްގެން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ސޮކަ މޭޓްސް (އެމްއެސްއެމް) ގުޅިގެން ކުރިއަށްގެންދާ މުބާރާތެކެވެ. މި މުބާރާތުގައި ތިން އުމުރުފުރާ އެއް ކުރިއަށްދާއިރު، އަށް ކުލަބަކުން އަންނަނީ ޓީމްތައް ވާދަކުރަމުންނެވެ.

ދިވެހި ޔޫތު ލީގުގެ 16 އަހަރުގެ މެޗުތައް ފަށާފައިވަނީ ޓީސީ ސްޕޯޓްސް ކުލަބާއި، ޔުނައިޓެޑް ވިކްޓްރީ ވާދަކުރި މެޗުންނެވެ. މި މެޗު 5-0 އިން ކާމިޔާބުކުރީ ޓީސީ އެވެ.

މި މެޗު ޝަރަފްވެރިކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ. މީގެ އިތުރުން ކުޅިވަރު ވުޒާރާގެ ސްޓޭޓް މިނިސްޓަރ މުޙައްމަދު ރިޔާޒް އާއި އެފްއޭއެމްގެ ޖެނެރަލް ސެކްޓްރީ ނާހިލް އަހުމަދުގެ އިތުރުން ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ، އަލީ އަޝްފާގުވެސް މި މެޗު ބައްލަވާލައްވަން ދަނޑަށް ވަޑައިގެންނެވި އެވެ.

ދިވެހި ޔޫތު ލީގުގެ މެޗުތައް ޖެނުއަރީ 28 އާ ހަމައަށް ކުރިއަށްދާނެ އެވެ.