އެކި ކުޅިވަރުތަކުން ޤައުމީ ރެކޯޑު ގާއިމުކޮށްފައިވާ ދިވެހި އެތުލީޓުންގެ އަގުވަޒަންކޮށްފިއެވެ.

ޤައުމީ ފެންވަރެއްގައި ފުރަތަމަ ފަހަރަށް ޤައުމީ ރެކޯޑު ގާއިމުކޮށްފައިވާ އެތުލީޓުންގެ އަގުވަޒަންކޮށްފައިވަނީ "ސެލެބްރޭޓިންގ ސްޕޯޓްސް" ގެ ނަމުގައި ޒުވާނުންގެ މަރުކަޒުގައި ބޭއްވި ޚާއްސަ ހަފުލާގެ ތެރެއިންނެވެ. މި ހަފުލާ ޝަރަފުވެރިކޮށްދެއްވީ އުއްތަމަ ފަނޑިޔާރު މުއުތަސިމް އަދުނާނެވެ.

މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން އިސްނަންގަވައިގެން ބޭއްވި މި ހަފުލާގައި ވަނީ އެތުލެޓިކްސް އާއި، ސްވިމިން އަދި ޝޫޓިންއިން ޤައުމީ ރިކޯޑު ގާއިމުކޮށްފައިވާ އެތުލީޓުންނަށް މެޑެއްޔަކާއެކު ޚާއްސަ ހަނދާނީ ލިޔުމެއް އަރުވާފައެވެ.

އެގޮތުން އެތުލެޓިކްސް އިން 42 އެތުލީޓުން، ސ ްވިމިންގ 17 އެތުލީޓުން އަދި ޝޫޓިން އިން 12 އެތުލީޓުންނާއެކު ޖުމްލަ 71 އެތުލީޓުންނަށް ވަނީ ޤައުމީ ރެކޯޑް ޤާއިމްކުރިކަމުގެ މެޑަލް ދީފައެވެ. މި އެތުލީޓުންނަށް މެޑަލް ހަވާލުކޮށްދެއްވީ އުއްތަމަ ފަނޑިޔާރު މުއުތަސިމް އަދުނާނެވެ.

މީގެ އިތުރުން މި ހަފްލާގައި ވަނީ ޔޫތު މިނިސްޓްރީން ކުރިޔަށްގެންދާ އަރުތަ ޕްރޮގްރާމްގައި މުޅިން އަލަށް ހިމެނުނު އެތުލީޓުނަށް އެގްރީމަންޓް ހަވާލުކޮށްފައެވެ. މި އިވެންޓްގައި މުޅިން އަލަށް 15 އެތުލީޓުންނަށް ވަނީ އެގްރީމެންޓް ހަވާލުކުރެވިފައެވެ. މިއާއެކު މުޅި ޖުމްލަ 40 އެތުލީޓުންނަށް މިހާރު މި ވަނީ އަރުތަ ޕްރޮގްރާމްގެ ދަށުން ތަމްރީން ފުރިހަމަކުރުމުގެ ފުރުޞަތު ލިބިގެން ގޮސްފައެވެ.