ހުޅުމާލޭގައި އަޅާ ފުޓްސަލް ކޮމްޕްލެކްސްގެ ސަބަބުން މާލޭގެ ކުޅިވަރު ކުޅޭ ތަންތަނަށް އަންނަ ތޮއްޖެހުމަށް ހައްލެއް ލިބިގެން ދާނެކަމަށް ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު ވިދާޅުވެއްޖެ އެވެ.

ގްރޭޓާ މާލޭ ސަރަހައްދުގައި މިވަގުތު ކުޅިވަރު ކުޅުމަށް ދިމާވެފައިވާ ގޮންޖެހުމަކީ މިވަގުތު ހުރި ވަސީލަތްތަކަށް ބޮޑު ޑީމާންޑެއް އޮތުމެވެ. އެހެންކަމުން ކުޅިވަރު ކުޅޭ ތަންތަނުގައި ތޮއްޖެހުން ބޮޑުވެ، ކުޅިވަރު ކުރިއެރުވުމަށް އުނދަގޫތަކެއް އެބަހުއްޓެވެ.

މިކަމަށް ހައްލެއް ހޯދައިދެއްވުމަށް މި ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ. މިގޮތުން ހުޅުމާލޭގައި ދެ ސްޕޯޓްސް އެއް ގާއިމްކުރުމުގެ މަސައްކަތް މިވަގުތު ދަނީ ކުރިއަށެވެ.

ކުޅިވަރު ވަޒީރު ރާފިޢު ވިދާޅުވީ ހުޅުމާލޭގައި އަޅާ ފުޓްސަލް ކޮމްޕްލެކްސްގެ ސަބަބުން މާލޭގައި ކުޅިވަރު ކުޅޭ ތަންތަނަށް އަންނަ ތޮއްޖެހުމަށް ރަނގަޅު ހައްލެއް ލިބިގެންދާނެކަމަށެވެ. އަދި މިއީ ކުޅިވަރު އެސޯސިއޭޝަންތަކައްވެސް ލިބޭނެ ހިތްހަމަޖެހުމެއް ކަމަށެވެ.

ހުޅުމާލޭގައި އަޅާ ސްޕޯޓްސް ދެ ކޮމްޕްލެކްސްގައި އިންޑޯ ކުޅިވަރުތައް ކުޅުމަށް އެކަށީގެންވާ ވަސީލަތްތައްވެސް ހިމެނޭނެ އެވެ.