54 ވަނަ އޭޝިއަން ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް 2022 ރަސްމީކޮށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް އިފްތިތާހު ކޮށްދެއްވައިފިއެވެ.

ޖުލައި މަހުގެ 15 އިން 21 ގެ ނިޔަލަށް ކ.މާފުށީގައި ބާއްވާ މި މުބާރާތް ހުޅުވުމުގެ ރަސްމީޔާތުގައި ރައީސުލްޖުމްހޫރިއްޔާގެ އިތުރުން މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަހުލޫފްގެ އިތުރުން ސަރުކާރު ހިއްސާވާ ބައެއް ކުންފުނިތަކުގެ މެނޭޖިންގ ޑިރެކްޓަރުންގެ އަދި މުބާރާތުގައި ވާދަކުރާ ބައެއް ޤައުމުތަކުގެ ސަފީރުން ވެސް ވަނީ މި ރަސްމީޔާތުގައި ބައިވެރިވެވަޑައިގެންފައެވެ.

މި ރަސްމީޔާތުގައި އޭޝިއަން ބޮޑީ ބިލްޑިން ފެޑެރޭޝަން (އޭބީބީއެފް) އިން ވަނީ ރައީސް ޞާލިޙް އާއި ޔޫތް މިނިސްޓަރ އަޙުމަދު މަހުލޫފް ބޮޑީބިލްޑިން ކުރިއަރުވަން ކުރައްވާ މަސައްކަތުގެ އަގުވަޒަން ކުރުމުގެ ގޮތުން ހާއްސަ އެވޯޑެއް އަރުވާފައެވެ.

މުބާރާތުގެ ފިރިހެން ބައި ކ.މާފުށީގައި ބާއްވާއިރު، އަންހެން ބައި ބޭއްވުމަށް ހަމަޖެހިފައިވަނީ ކްރޮސްރޯޑްސް މޯލްޑިވްސްގައެެވެ. މިފަހަރުގެ މުބާރާތުގައި 24 ޤައުމަކުން 400 އަށް ވުރެ ގިނަ އެތްލީޓުންނާއި، އޮފިޝަލުން ބައިވެރިވެއެވެ.