ދިވެހިން ބޭނުންވާ ފެންވަރުގެ ސްޓޭޑިއަމެއް މި ސަރުކާރުން ހުޅުމާލޭގައި އަޅާނެ ކަމަށް ސްޕޯޓްސް މިިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.

ހުޅުމާލެ ސްޓޭޑިއަމްއާ ގުޅޭގޮތުން ވާހަކަދައްކަވަމުން މިނިސްޓަރ ވިދާޅުވީ މީގެ ކުރިން ވެސް ހުޅުމާލޭގައި ސްޓޭޑިއަމެއް އަޅަން ބިމެއް ކަނޑައަޅާފައި އޮތް ނަމަވެސް މި ސަރުކާރުން ހަވާލުވިއިރު، އެ ބިން އޮތީ ކޮންސްޓްރަކްޝަން މިނިސްޓްރީގެ ބެލުމުގެ ދަށަށް ބަދަލުކޮށްފައި ކަމަށެވެ.

މިހާރު އެ ބިން ކުޅިވަރު ވުޒާރާގެ ދަށަށް ބަދަލުކުރެވިފައިވާކަމަށާއި، އެތަނުގައި ސްޓޭޑިއަމް އެޅުމަށް ބޭނުންވާ ފައިސާ ހޯދުމުގެ މަސައްކަތް މިހާރު ކުރަމުން އަންނަކަމަށެވެ.

ސްޓޭޑިއަމްގެ ތަފްސީލް ދެއްވަމުން މިނިސްޓަރ ވިދާޅުވީ ކުރެހުންތައްވެސް މިހާރު ހުރީ ނިމިފައިކަމަށާއި، ދިވެހިން ފަހުރުވެރިވާ ވަރުގެ ސްޓޭޑިއަމެއް ހުޅުމާލޭގައި އެޅުމަކީ އުއްމީދުކަމަށެވެ.