އިންޑިއަން އޯޝަން އައިލޭންޑް ގޭމްސް (އައިއޯއައިޖީ) ގައި ވާދަކުރި އެތުލީޓުންނަށް ރަތްދޫލައިގެ މަރުޙަބާއެއް ކިޔައިފިއެވެ.

ރާއްޖޭގެ ކޮންޓިންޖެންޓުން ހޯދި ކާމިޔާބީ ފާހަގަކުރުމަށް ޖުމްހޫރީ މައިދާނުގައި ކުރިއަށްދިޔަ ޚާއްސަ ރަސްމިޔާތުގައި އެތުލީޓުންނަށް ރަތްދޫލައިގެ މަރުޙަބާއެއް ދެންނެވީ ދިވެހިރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އެ މަނިކުފާނުގެ އަނބިކަނބަލުން ފަޒްނާ އަޙްމަދެވެ.

މީގެ އިތުރުން މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަހުލޫފް އާއި ސަރުކާރުގެ ވުޒާރާތަކުގެ އިސްވެރިންގެ އިތުރުން ކުޅިވަރު އާއިލާގެ ގިނަ އަދަދެއްގެ ފަރާތްތަކުން ވަނީ އެތުލީޓުންނަށް މަރުހަބާ ދެންނެވުމަށް ޖުމްހޫރީ މައިދާނަށް ވަޑައިގެންފައެވެ.

މި ރަސްމިއްޔާތުގައި ރާއްޖޭގެ ކޮންޓިންޖެންޓް ރައީސުލްޖުމްހުރިއްޔާއަށް ތައާރަފުކޮށް އެރުވިއިރު، މެޑަލް ހޯދި އެތުލީޓުން ތައާރަފުކޮށް އެރުވީ މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ގެ ބެރުޖެހުމާއި ތާޅަފިލީގެ ހަރަކާތާއެކުވެ.

މިފަހަރުގެ އިންޑިއަން އޯޝަން އައިލެންޑް ގޭމްސްގައި ރާއްޖެއިން ވަނީ ޖުމްލަ 28 މެޑަލް ހޯދާފައެވެ. އޭގެތެރޭގައި 5 ރަން މެޑަލް، 9 ރިހި މެޑަލް އަދި 14 ލޯ މެޑަލް ހިމެނެއެވެ.

މިއީ ރާއްޖޭން މަލްޓި ސްޕޯޓްސް އިވެންޓެގައި ހޯދި އެންމެ ބޮޑު ކާމިޔާބީއެވެ.