އިންޑިއަން އޯޝަން އައިލެންޑް ގޭމްސް 2023 ގައި ދިވެހިރާއްޖޭގެ އެތުލީޓުން ހޯދި ކާމިޔާބީ ފާހަގަކުރުމަށް ކުލަގަދަ ރަސްމިއްޔާތެއް ބޭއްވުމަށް މިނިސްޓްރީ އޮފް ޔޫތު ސްޕޯޓްސް އެންޑް ކޮމިިއުނިޓީ އެމްޕަވަރމަންޓް އިން ނިންމައިފިއެވެ.

މަޑަގަސްކަރައިގައި އޮގަސްޓް މަހުގެ 25 އިން ސެޕްޓެމްބަރ މަހުގެ 3 ނިޔަލަށް ކުރިޔަށް ގެންދިޔަ މި މުބާރާތުގައި ރާއްޖޭން ވަނީ 28 މެޑަލް ހޯދާފައެވެ. އެންމެ ފަހުން 2019 ވަނަ އަހަރު ބޭއްވި އައިއޯއައިޖީގައި ރާއްޖެއަށް ހޯދުނީ 15 މެޑަލްއެވެ.

މިފަހަރުގެ އައިއޯއައިޖީގައި ރާއްޖޭގެ އެތުލީޓުން ހޯދި ކާމިޔާބީ ފާހަގަކުރުމުގެ ގޮތުން 5 ސެޕްޓެމްބަރ 2023 ވާ އަންގާރަ ދުވަހުގެރޭ 8:45 ޖުމްހޫރީ މައިދާނުގައި ކުލަގަދަ ރަސްމިއްޔާތެއް ބޭއްވުމަށް ވަނީ ނިންމާފައެވެ. ހަވާއެރުމާއެކު ކުރިޔަށް ގެންދިޔުމަށް ހަމަޖެހިފައިވާ މި އިވެންޓުގައި ވީހާވެސް ގިނަ ރައްޔިތުން ބައިވެރިވުމަކީ ޔޫތު މިނިސްޓްރީގެ ވަރަށް ބޮޑު އެދުމެކެވެ.