އަރިއަތޮޅު އުތުރުބުރީ ތޮއްޑޫގައި އަލަށް ޤާއިމްކުރާ ބެޑްމިންޓަން ކޯޓުގެ ބިންގާއަޅައިފިއެވެ.

މިކޯޓުގެ ބިންގާ އެޅީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަރިއަތޮޅު އުތުރުބުރީގެ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެރަށަށް ވަޑައިގެން ބޭއްވި ރަސްމިއްޔާތެއްގައެވެ.

އއ. ތޮއްޑޫގައި ގާއިމުކުރާ ބެޑްމިންޓަން ކޯޓުގެ ބިންގާ އަޅުއްވައިދެއްވީ ކުޅިވަރާ ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ. މިކޯޓުގެ މަސައްކަތް ހަވާލުކޮށްފަވަނީ ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) އާއެވެ.

އަރިއަތޮޅު އުތުރުބުރިއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ތޮއްޑޫގެ ރައްޔިތުންނާ ބައްދަލުކުރައްވާ ރައީސް ވަނީ ކުޅިވަރުގެ ދާއިރާއިން ތޮއްޑުއަށް ގިނަ ތަރައްގީތަކެއް ގެނެސްދެއްވާނެކަމުގެ އުފާވެރި ޚަބަރު ދެއްވާފައެވެ.

ރާއްޖެއަކީ ދުޅަހެޔޮ ހަށިހެޔޮ އާބާދީއެއް ނިސްބަތްވާ ގައުމަކަށް ހެދުމަށްޓަކައި ރައީސުލްޖުމްހޫރިއްޔާވަނީ ރާއްޖޭގެ ހުރިހާ ރަށެއްގައި އައުޓްޑޯ ޖިމްތަކާއި ފިޓްނެސް އެންޑް ރެކްރިއޭޝަން ސެންޓަރުތައް ގާއިމުކުރުމުގެ މަސައްކަތް ފައްޓަވާފައެވެ. އޭގެ އިތުރުންވެސް އެކި ކުޅިވަރުތަކަށް ޚާއްސަ ކޯޓުތައް އެޅުމުގެ މަސައްކަތްވެސް މި މަޝްރޫޢާއެކު ފެށިގެންގޮސްފަވާއިރު މިމަސައްކަތްތައް ވީހާވެސް އަވަހަކަށް ނިންމުމަކީ ސަރުކާރުގެ އަމާޒެކެވެ.