9 ރަށެއްގައި ކުޅިވަރު ވަސީލަތްތައް ޤާއިމްކުރުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން ކޮންޓްރެކްޓަރުންނާއެކު ސޮއިކޮށްފިއެވެ.

މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގައި މިއަދު ކުރިޔަށްގެންދިޔަ ރަސްމިއްޔާތެއްގައި ކުޅިވަރު ވަސީލަތްތައް ޤާއިމްކުރުމަށް ކޮންޓްރެކްޓަރުންނާއެކު ސޮއިކޮށްފައިވަނީ، އއ.ބޮޑުފޮޅުދޫ، ފުވައްމުލައް ސިޓީ، ގއ.ކޮނޑޭ، ލ.މާމެންދޫ، ކުޅުދުއްފުށި ސިޓީ، ނ.މިލަދޫ، އދ.މާމިގިލި، ށ.ފީވަކުގެ އިތުރުން އއ.މަތިވެރީގައި ކުޅިވަރު ވަސީލަތްތައް ގާއިމްކުރުމަށެވެ.

މި އެއްބަސްވުންތަކުގެ ދަށުން އއ.ބޮޑުފޮޅުދޫ އަދި އދ.މާމިގިލި އަދި އއ.މަތިވެރީގައި ޔޫތު އެންޑް ކޮމިއުނިޓީ ސެންޓަރު ތަރައްޤީކުރުމަށް ހަވާލުކޮށްފައިވަނީ ޓޫއޭ ކޮމްޕެނީ ޕްރައިވެޓް ލިމިޓެޑްއާއެވެ. މި މަސައްކަތް އެ ކުންފުންޏާއި ހަވާލުކުރީ މަސައްކަތް ފަށާތާ، 125 ދުވަހުގެ ތެރޭގައި ނިންމަން ޖެހޭ ގޮތަށެވެ.

މި 3 ރަށުގައި ޔޫތު އެންޑް ކޮމިއުނިޓީ ސެންޓަރ ޤާއިމްކުރުމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރ އަޙްމަދު މުހައްމަދުއެެވެ. ޓޫ އޭ ކޮމްޕެނީ ޕްރައިވެޓް ލިމިޓެޑްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ސޭލްސް އެންޑް އޮޕަރޭޝަންސް މެނޭޖަރ މުޙައްމަދު އައިމަން އަޙްމަދުއެވެ.

ށ.ފީވައް އަދި ގއ.ކޮނޑޭގައި ޔޫތު އެންޑް ކޮމިއުނިޓީ ސެންޓަރު ތަރައްޤީކުރުމަށް ޔޫތު މިނިސްޓްރީން ހަވާލުކޮށްފައިވަނީ ލައިކަންސް އިންވެސްޓްމަންޓްއާއެވެ. މި މަސައްކަތް އެ ކުންފުންޏާއި ހަވާލުކުރީ މަސައްކަތް ފަށާތާ، 110 ދުވަހުގެ ތެރޭގައި ނިންމަން ޖެހޭ ގޮތަށެވެ.

މި އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ، ޑެޕިއުޓީ މިނިސްޓަރ އަޙްމަދު މުހައްމަދުއެވެ. ލައިކަންސް އިންވެސްޓްމަންޓްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ވެރިޔާ ޢަބްދުﷲ ކަލީމްއެވެ.

ނ.މިލަދޫ ފުޓްބޯޅަ ދަނޑުގެ ޓާރފް ސަޕްލައިކޮށް އިންސްޓޯލްކުރުމުގެ މަސައްކަތް ކުރުމަށް ޔޫތު މިނިސްޓްރީން ހަވާލުކުރީ އޯޓެކްސް ޕްރައިވެޓް ލިމިޓެޑްއާއެވެ. މި މަސައްކަތް އެ ކުންފުންޏާއި ހަވާލުކުރީ 4،963،965.71 މިލިއަން ރުފިޔާއަށެވެ. އަދި މަސައްކަތް ފަށާތާ 90 ދުވަހުގެ ތެރޭގައި މި މަސައްކަތް ނިންމަން ޖެހޭނެއެވެ.

މި އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ، ޑެޕިއުޓީ މިނިސްޓަރ އަޙްމަދު މުޙައްމަދުއެވެ. އޯޓެކްސް ޕްރައިވެޓް ލިމިޓެޑްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަޙުމަދު ޝަރީފްއެވެ.

ލ.މާމެންދޫ ފުޓްބޯޅަ ދަނޑުގެ ލައިޓިންގ ސިސްޓަމް ޤާއިމްކުރުމަށް ޔޫތު މިނިސްޓްރީން ހަވާލުކޮށްފައިވަނީ ތިޙްނާން އިންވެސްޓްމަންޓްއާއެވެ. މަސައްކަތް ފަށާތާ 45 ދުވަހުގެ ތެރޭގައި ނިންމަން ޖެހޭގޮތަށް މި މަސައްކަތް އެ ކުންފުންޏާއި ހަވާލުކުރީ 2،581،987.10 މިލިއަން ރުފިޔާއަށެވެ.

މި އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ، ޑެޕިއުޓީ މިނިސްޓަރ އަޙްމަދު މުޙައްމަދުއެވެ. ތިޙްނާން އިންވެސްޓްމަންޓްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޕްރޮޖެކްޓް މެނޭޖަރ އަރުޝަމް ޢަބްދުއްރަޙީމްއެވެ.

މީގެ އިތުރުން ކުޅުދުއްފުށި ސިޓީ ހިރަފުސް ދަނޑުގައި ލައިޓިންގ ސިސްޓަމް ޤާއިމްކުރުމަށް ޔޫތު މިނިސްޓްރީން ހަވާލުކޮށްފައިވަނީ ތްރީ ޓްރީ މޯލްޑިވްސް އާއެވެ. މި މަސައްކަތް އެ ކުންފުންޏާއި ހަވާލުކުރީ މަސައްކަތް ފަށާތާ 45 ދުވަހުގެ ތެރޭގައި ނިންމަން ޖެހޭގޮތަށް 2،600،601.66 މިލިއަން ރުފިޔާއަށެވެ.

މި އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ، ޑެޕިއުޓީ މިނިސްޓަރ އަޙްމަދު މުޙައްމަދުއެވެ. ތްރީ ޓްރީ މޯލްޑިވްސްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޕްރޮޖެކްޓް މެނޭޖަރ މުޙައްމަދު ނަޝްފާންއެވެ.

އަދި ފުވައްމުލައް ސިޓީ ދޫޑިގަން އަވަށު ފުޓްބޯޅަ ދަނޑުގެ ރޮސްޓްރަމް ޤާއިމްކުރުމަށް ޔޫތު މިނިސްޓްރީން ވަނީ އަމްލޮގް އާއި ހަވާލުކޮށްފައެވެ. މި މަސައްކަތަކީ މިނިސްޓްރީގެ ބަޖެޓުން 3،858،695.94 މިލިއަން ރުފިޔާ ހަރަދުކޮށްގެން ކުރިޔަށްގެންދަން ނިންމާފައިވާ ޕްރޮޖެކްޓްއެކެވެ. މި ޕްރޮޖެކްޓްގެ މުއްދަތަކީ މަސައްކަތް ފަށާ ދުވަހުން ފެށިގެން 120 ދުވަހުއެވެ.

މި އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ، ޑެޕިއުޓީ މިނިސްޓަރ އަޙްމަދު މުޙައްމަދުއެވެ. އަމްލޮގްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ އެކައުންޓެންޓް އަލީ ރުޒާމްއެވެ.