ސަރުކާރުގެ ފުރަތަމަ ހަ މަސްދުވަހު، ކުޅިވަރުގެ އެކި މަޝްރޫޢުތަކަށް 528 މިލިއަން ރުފިޔާ ޚަރަދުކޮށްފައިވާކަމަށް ކުޅިވަރާ ބެހޭ ވުޒާރާއިން ހާމަކޮށްފި އެވެ. 

ކުޅިވަރާއި ހަށިހެޔޮކަމާ ބެހޭ ވުޒާރާގެ މަސައްކަތްތަކާ ގުޅޭގޮތުން މައުލޫމާތުދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ސްޓޭޓް މިނިސްޓަރު އިބްރާހިމް އާމިރު ވިދާޅުވީ ކުޅިވަރު ވުޒާރާގެ 176 ޕްރޮޖެކްޓެއްގެ މަސައްކަތް މިވަގުތު ކުރިއަށްދާއިރު، މި މަޝްރޫޢުތަކަށް މިދިޔަ ހަ މަސްދުވަހު އެކަނިވެސް 528 މިލިއަން ރުފިޔާ ޚަރަދުކޮށްފައިވާކަމަށެވެ. 

176 މަޝްރޫޢުގެ ތެރެއިން 23 މަޝްރޫޢުއަކީ މި ސަރުކާރުން މުޅިން އަލަށްފެށި މަޝްރޫޢުތަކެއްކަމަށާއި، އަލަށް ފެށި ކަންކަމަށް 83 މިލިއަން ރުފިޔާ ހޭދަކޮށްފައިވާކަމަށެވެ. 

ސްޓޭޓް މިނިސްޓަރު ޢާމިރު ވިދާޅުވީ މުޅިން އަލަށް ފެށި މަޝްރޫޢުތަކުގެ ތެރޭގައި ހިމެނެނީ   ފުޓްބޯޅަ ދަނޑުތަކުގެ ސަބްބޭސްގެ މަސައްކަތަކާއި، ޓާފް އެޅުމުގެ މަސައްކަތުގެ އިތުރުން، ފުޓްބޯޅަ ދަނޑުތަކުގައި ފެންސު ޖެހުމުގެ މަސައްކަތާއި، ފުޓްބޯޅަ އަދި ވޮލީބޯޅަ ދަނޑުތަކުގެ މަރާމާތުގެ ބައެއް މަސައްކަތްތަކެވެ.

ދަނޑުތަކުގެ މަރާމާތުގެ މަސައްކަތުގެ ތެރެއިން އެންމެ ފާހަގަކޮށްލެވެނީ ދިވެހިރާއްޖޭގެ އެކި ސަރަހައްދުތަކުގައި ހުރި ޒޯން ސްޓޭޑިއަމްތައް މަރާމާތުކުރުމެވެ. މިގޮތުން އައްޑޫ ސިޓީގެ ހިތަދޫގެ ޒޯން ސްޓޭޑިއަމް އާއި ކުޅުދުއްފުށީގެ ޒޯން ސްޓޭޑިއަމްގެ އިތުރުން ގދ. ތިނަދޫ ޒޯން ސްޓޭޑިއަމްގެ މަރާމާތުގެ މަސައްކަތްދަނީ ކުރިއަށެވެ.

މީގެ އިތުރުން ހަތަރު އަހަރަށްފަހު ގަލޮޅު ދަނޑުގެ ލައިޓިން ސިސްޓަމް މަރާމާތު ކުރުމުގެ މަސައްކަތްވެސް މިވަގުތު ވަރަށް ބާރަށް ކުރިއަށް އެބަ ދެ އެވެ.