3 ރަށެއްގެ ފުޓްބޯޅަ ދަނޑުގެ ސަބްބޭސް ތައްޔާރުކުރުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން ކޮންޓްރެކްޓަރުންނާއެކު ސޮއިކޮށްފިއެވެ.

މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގައި މިއަދު ކުރިޔަށްގެންދިޔަ ރަސްމިއްޔާތެއްގައި ކޮންޓްރެކްޓަރުންނާއެކު ސޮއިކޮށްފައިވަނީ، ރ.އިނގުރައިދޫ، ބ.ދޮންފަނު އަދި  ހދ.ކުމުންދޫ ފުޓްބޯޅަ ދަނޑުގެ ސަބްބޭސް ތައްޔާރުކުރުމުގެ މަސައްކަތުގެ އެއްބަސްވުމުގައެވެ.

މި އެއްބަސްވުންތަކުގެ ދަށުން ރ.އިނގުރައިދޫ ފުޓްބޯޅަ ދަނޑުގެ ސަބްބޭސް ތައްޔާރުކުރުމުގެ މަސައްކަތް ކުރުމަށް ޔޫތު މިނިސްޓްރީން ހަވާލުކޮށްފައިވަނީ އާރް.ކޭ.އެލް ގްރޫޕް ޕްރައިވެޓް ލިމިޓެޑް އާއެވެ. މި މަސައްކަތް އެ ކުންފުންޏާއި ހަވާލުކުރީ މަސައްކަތް ފަށާތާ، 60 ދުވަހުގެ ތެރޭގައި ނިންމަން ޖެހޭ ގޮތަށެވެ. މި ޕްރޮޖެކްޓް އަކީ ޔޫތު މިނިސްޓްރީގެ ބަޖެޓުން،2،308،033.67 މިލިއަން ރުފިޔާ ހަރަދުކޮށްގެން ކުރިިޔަށްގެންދަން ނިންމާފައިވާ ޕްރޮޖެކްޓް އެކެވެ.

ބ.ދޮންފަނު ފުޓްބޯޅަ ދަނޑުގެ ސަބްބޭސް ތައްޔާރުކުރުމުގެ މަސައްކަތް ކުރުމަށް ޔޫތު މިނިސްޓްރީން ހަވާލުކޮށްފައިވަނީވެސް އާރް.ކޭ.އެލް ގްރޫޕް ޕްރައިވެޓް ލިމިޓެޑް އާއެވެ. މި މަސައްކަތް އެ ކުންފުންޏާއި ހަވާލުކުރީ މަސައްކަތް ފަށާތާ، 60 ދުވަހުގެ ތެރޭގައި ނިންމަން ޖެހޭ ގޮތަށެވެ. މި ޕްރޮޖެކްޓް އަކީ ޔޫތު މިނިސްޓްރީގެ ބަޖެޓުން،2،315،381.03 މިލިއަން ރުފިޔާ ހަރަދުކޮށްގެން ކުރިިޔަށްގެންދަން ނިންމާފައިވާ ޕްރޮޖެކްޓް އެކެވެ.

ރ.އިނގުރައިދޫ އަދި ބ.ދޮންފަނު ފުޓްބޯޅަ ދަނޑުގެ ސަބްބޭސް ތައްޔާރުކުރުމުގެ މަސައްކަތުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރ އަޙުމަދު މުހައްމަދު އެވެ. އަދި  އާރް.ކޭ.އެލް ގްރޫޕް ޕްރައިވެޓް ލިމިޓެޑްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޖެނެރަލް މެނޭޖަރ - އޮޕަރޭޝަންސް މުޙައްމަދު މޫސާފުޅުއެވެ.

މީގެ އިތުރުން ހދ.ކުމުންދޫ ފުޓްބޯޅަ ދަނޑުގެ ސަބްބޭސް ތައްޔާރުކުރުމަށް ހަވާލުކޮށްފައިވަނީ އާރު.ޖީ އިންޓަނޭޝަނަލް ޕްރައިވެޓް ލިމިޓެޑް އާއެވެ. މި މަސައްކަތް އެ ކުންފުންޏާއި ހަވާލުކުރީ މަސައްކަތް ފަށާތާ، 60 ދުވަހުގެ ތެރޭގައި ނިންމަން ޖެހޭ ގޮތަށެވެ. މި ޕްރޮޖެކްޓް އަކީ ޔޫތު މިނިސްޓްރީގެ ބަޖެޓުން، 2،843،113.42 މިލިއަން ރުފިޔާ ހަރަދުކޮށްގެން ކުރިިޔަށްގެންދަން ނިންމާފައިވާ ޕްރޮޖެކްޓް އެކެވެ.

ހދ.ކުމުންދޫ ފުޓްބޯޅަ ދަނޑުގެ  ސަބްބޭސް ތައްޔާރުކުރުމުގެ މަސައްކަތުގެ އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރ އަޙުމަދު މުޙައްމަދު އެވެ. އާރު.ޖީ އިންޓަނޭޝަނަލް ޕްރައިވެޓް ލިމިޓެޑް ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޑިރެކްޓަރ އަޙުމަދު އާސިފްއެވެ.