2 ރަށެއްގެ ފުޓްބޯޅަ ދަނޑުގައި ޓާރފް އެޅުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން ކޮންޓްރެކްޓަރުންނާއެކު ސޮއިކޮށްފިއެވެ.

ޔޫތު މިނިސްޓްރީގައި މިއަދު ކުރިޔަށްގެންދިޔަ ރަސްމިއްޔާތެއްގައި ސޮއިކޮށްފައިވަނީ ކ.ހިންމަފުށި އަދި ކ.ހުރާ ފުޓްބޯޅަ ދަނޑުގައި ޓާރފް އެޅުމުގެ މަސައްކަތުގެ އެއްބަސްވުމެއެވެ. މި 2 ރަށުގެ ފުޓްބޯޅަ ދަނޑުގައި ޓާރފް އެޅުމުގެ މަސައްކަތް ކުރުމަށް ޔޫތު މިނިސްޓްރީން ހަވާލުކޮށްފައިވަނީ ތްރީ ޓްރީ މޯލްޑިވްސް އާއެވެ.

ކ.ހިންމަފުށި އަދި ކ.ހުރާ ފުޓްބޯޅަ ދަނޑުގައި ޓާރފް އެޅުމުގެ މަސައްކަތުގެ އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރ އަޙުމަދު މުޙައްމަދުއެވެ. ތްރީ ޓްރީ މޯލްޑިވްސް ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޕްރޮޖެކްޓް މެނޭޖަރ މުހައްމަދު ނަޝްފާންއެވެ.

މި އެއްބަސްވުންތަކުގެ ދަށުން ކ.ހިންމަފުށި ފުޓްބޯޅަ ދަނޑުގައި ޓާރފް އެޅުމުުގެ މަސައްކަތް ކުރުމަށް ތްރީ ޓްރީ މޯލްޑިވްސް އާއި ހަވާލުކުރީ މަސައްކަތް ފަށާތާ، 70 ދުވަހުގެ ތެރޭގައި ނިންމަން ޖެހޭ ގޮތަށެވެ. މި ޕްރޮޖެކްޓް އަކީ ޔޫތު މިނިސްޓްރީގެ ބަޖެޓުން 4،798،935.72 (ހަތަރު މިލިއަން ހަތްލައްކަ ނުވަދިހަ އަށްހާސް ނުވަސަތޭކަ ތިރީސް ފަސްރުފިޔާ ހަތްދިހަ ދެލާރި) ހަރަދުކޮށްގެން ކުރިޔަށްގެންދަން ނިންމާފައިވާ ޕްރޮޖެކްޓް އެކެވެ.

މީގެ އިތުރުން ކ.ހުރާ ފުޓްބޯޅަ ދަނޑުގައި ޓާރފް އެޅުމުުގެ މަސައްކަތްވެސް ތްރީ ޓްރީ މޯލްޑިވްސް އާއި ހަވާލުކުރީ މަސައްކަތް ފަށާތާ، 70 ދުވަހުގެ ތެރޭގައި ނިންމަން ޖެހޭ ގޮތަށެވެ. މި ޕްރޮޖެކްޓް އަކީ ޔޫތު މިނިސްޓްރީގެ ބަޖެޓުން 4،792،455.72 (ހަތަރު މިލިއަން ހަތްލައްކަ ނުވަދިހަ ދެހާސް ހަތަރު ސަތޭކަ ފަންސާސް ފަސްރުފިޔާ ހަތްދިހަ ދެލާރި) ހަރަދުކޮށްގެން ކުރިޔަށްގެންދަން ނިންމާފައިވާ ޕްރޮޖެކްޓް އެކެވެ.