"19 ވަނަ އޭޝިއާ/އޯޝޭނިއާ ރީޖަން އިންޓަގަވަރްމެންޓަލް މިނިސްޓީރިއަލް މީޓިން އޮން އެންޓި-ޑޯޕިން އިން ސްޕޯޓްސް" ބައްދަލުވުމުގައި ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު ބައިވެރިވެވަޑައިގަންނަވައިފި އެވެ. 

މިމަހުގެ 22-23 އަށް އުޒްބަކިސްތާންގެ ޓަޝްކެންޓްގައި އޮތް މި ބައްދަލުވުމުގައި އޭޝިއާ/އޯޝޭނިއާގެ 34 ގައުމެއްގެ ކުޅިވަރު ވަޒީރުންނާއި، ވަޒީރުންގެ ނައިބުންގެ އިތުރުން އެ ގައުމުތަކުގެ އެންޓި-ޑޯޕިން އޭޖެންސީތަކުގެ މަންދޫބުން ބައިވެރިވި އެވެ. މީގެ އިތުރުން ދުނިޔޭގެ އެންޓި-ޑޯޕިން ޖަމިއްޔާ (ވާޑާ)ގެ ރައީސް ވިޓޯލްޑް ބަންކާގެ އިތުރުން ވާޑާގެ ނައިބް ރައީސް އަދި ޑިރެކްޓަރ ޖެނެރަލްވެސް ވަނީ މި ބައްދަލުވުމުގައި ބައިވެރިވެފަ އެވެ. 

މި ބައްދަލުވުމުގައި މައިގަނޑު ގޮތެެއްގައި މަޝްވަރާކުރެވުނީ ކުޅިވަރުގެ ތެރެއިން މަނާ ބޭސް ބޭނުންކުރުން މަދުކުރުމާއި ހުއްޓުވުމަށް އެޅޭނެ ފިޔަވަޅުތަކާއި، ކަމާ ގުޅުންހުރި އިދާރާތަކުގެ މަޝްވަރާއާއެކު މިކަމާ ގުޅުންހުރި އުސޫލުތައް ވަރުގަދަކުރެވޭނެ ގޮތްތަކާ ގުޅޭގޮތުންނެނެވެ. 

މި ބައްދަލުވުމުގައި މިނިސްޓަރ ރާފިޢު ވަނީ ރާއްޖޭގެ އެންޓި-ޑޯޕިން ޖަމިއްޔާ، މަޑާޑާގެ މަސައްކަތްތަަކާ ގުޅޭގޮތުން ބައިވެރިންނަށް މައުލޫމާތު ދެއްވާފަ އެވެ.